Grazas a Petón do Lobo por ter elaborado as primeiras alegacións contra o novo proxecto do PE. Arnoia.
Neste primeiro post, sinalaremos os principais impactos paisaxísticos do novo proxecto que enviou a trámite a promotora, a empresa Aratel, e no que se reducen o número de aeroxeradores e as alturas dos mesmos a respecto do proxecto inicial que combatemos entre 2024 e 2025, mais as afeccións seguen a ser severas e por iso volvemos a nos mobilizar contra a invasión eólica nas nosas comarcas.
GOLPE CONTRA A PAISAXE
O proxecto sitúase na comarca do Ribeiro, territorio incluído no Catálogo das Paisaxes de Galicia, que identifica paisaxes de elevado valor cultural, ambiental e territorial. O propio estudo ambiental do proxecto recoñece a existencia de áreas paisaxísticas relevantes na contorna, incluíndo as correspondentes ao Ribeiro, Baixo Arnoia e Ribeiras encaixadas do Miño e do Sil.
A instalación de aeroxeradores de grandes dimensións (rotor de 172 metros de diámetro e buxe de 114 metros) supón a introdución de infraestruturas industriais de enorme impacto visual, incompatibles coa preservación das paisaxes catalogadas. A Lei 7/2008 de protección da paisaxe de Galicia establece que as administracións públicas deben evitar alteracións que degraden a calidade paisaxística destes territorios.
Neste caso o impacto paisaxístico sería:
- permanente
- de grande magnitude
- visible desde amplas áreas da comarca
O proxecto resulta, polo tanto, contrario aos principios de protección e conservación da paisaxe recollidos na normativa galega.
O Estudo de Impacto e Integración Paisaxística do Parque Eólico AMR 7 PE Arnoia recoñece que o proxecto se localiza dentro da Gran Área Paisaxística Ribeiras Encaixadas do Miño e do Sil, unha unidade territorial de elevado valor ambiental, cultural e paisaxístico definida no Catálogo das Paisaxes de Galicia.
O propio documento describe esta área como un territorio caracterizado por:
- unha paisaxe fluvial singular dominada polo curso do río Miño,
- vales encaixados con forte personalidade xeomorfolóxica,
- mosaico agrario tradicional con presenza destacada de viñedo,
- valores escénicos e panorámicos moi relevantes no contexto galego.
Esta caracterización evidencia que se trata dun territorio cunha alta sensibilidade paisaxística, onde a introdución de infraestruturas industriais de gran escala debe ser analizada con especial rigor.
Porén, o propio estudo de impacto paisaxístico recoñece que a implantación dos aeroxeradores xerará unha visibilidade extremadamente elevada no territorio. Segundo a análise de cuencas visuais incluída no documento:
- polo menos un aeroxerador será visible desde o 44,7 % da superficie da área de estudo,
- dous aeroxeradores serán visibles desde o 30,6 % da superficie,
- catro aeroxeradores serán visibles desde o 33,7 % da superficie analizada.
Estes datos evidencian que o impacto visual do proxecto non será puntual nin local, senón extensivo a unha parte moi significativa da paisaxe do Ribeiro e das comarcas veciñas, afectando amplas zonas do territorio.
A seguir, unha relación cos 10 concellos máis afectados:
- Ramirás: aeroxeradores visíbeis desde 44 núcleos.
- Crecente: 43 núcleos afectados.
- Cartelle: 39 núcleos afectados.
- Gomesende: 30 núcleos afectados.
- Padrenda: 25 núcleos afectados.
- Celanova: 18 núcleos afectados.
- Melón: 13 núcleos afectados.
- Cenlle: 12 núcleos afectados.
- San Amaro: 10 núcleos afectados.
- A Arnoia: 7 núcleos afectados.
É dicir, no caso da Comarca de Celanova, os aeroxeradores veríanse desde 162 núcleos de 7 concellos.
A implantación de aeroxeradores de gran altura neste contexto supón introducir elementos verticais dominantes que rompen a escala e a coherencia visual da paisaxe, converténdose en focos de atención visual permanente e alterando a percepción dun territorio recoñecido polos seus valores escénicos.
Resulta especialmente relevante que o propio documento recoñeza esta ampla visibilidade territorial, xa que iso evidencia que as medidas de integración paisaxística propostas non son capaces de evitar nin reducir significativamente o impacto visual do proxecto.
O Estudo de Impacto e Integración Paisaxística do Parque Eólico AMR 7 PE Arnoia recoñece que a análise visual do proxecto se realiza nun ámbito territorial moi amplo debido á elevada altura dos aeroxeradores e á capacidade destes elementos para ser visibles a grandes distancias.
Segundo o propio documento, para avaliar a visibilidade do proxecto considérase unha área de estudo cunha superficie aproximada de 707,3 km² arredor dos aeroxeradores, á que se engade unha área adicional para a análise da liña de evacuación, resultando unha superficie total analizada de 747,8 km².
Esta é a lista dos 25 principais elementos que sofrirían un impacto visual pola infraestrutura asociada ao polígono eólico:
- Gran Área Paisajística Ribeiras Encaixadas do Miño e do Sil (visíbel desde o 44,7% de súa superficie).
Áreas de Especial Interés Paisajístico (AEIP) - AEIP Baixo Arnoia.
- AEIP Torre de Sande.
- AEIP San Cibrao de Las.
- AEIP Pozas e fervenzas do Río Cerves.
- AEIP Pena Corneira.
- AEIP Río Deva.
- AEIP Castromao.
- AEIP Pena Gache – Serra do Leboreiro.
Lugares de Especial Interés Paisajístico (LEIP) - San Paio dos Pitos.
- Serra do Suído.
- Encoro de Castrelo do Miño.
Miradoiros - Miradoiro de Coto Novelle.
- Miradoiro Santiago do Viñal.
- Miradoiro de Guillade.
- Miradoiro Monte de O Castro.
Camiños e Itinerarios Paisaxísticos - Ruta De Ourense a Castelo de Ribadavia (Panorámico).
- Itinerario Fragas de Gorgua (Natural).
- Itinerario Celanova Milenaria (BIC).
- Itinerario Mosteiro de Melón (BIC).
- Ruta De Ourense a Ribadavia (Panorámico).
Patrimonio Cultural (BIC e Catalogado) - BIC Torre de Sande.
- Iglesia de Santa María de Castrelo de Miño.
- Casa Grande do Pazo.
Espazos Naturais e Inventario de Zonas Húmidas - Encoro de Frieira. Humidal.
En consecuencia, o proxecto non garante unha adecuada integración paisaxística nin respecta os obxectivos de calidade paisaxística establecidos na Lei 7/2008 de protección da paisaxe de Galicia e no Convenio Europeo da Paisaxe, ao provocar unha alteración visual significativa nunha área paisaxística de elevado valor.
Por todo o anterior, considérase que o impacto paisaxístico do proxecto resulta desproporcionado e incompatible coa conservación dos valores paisaxísticos do territorio, polo que debe ser motivo suficiente para a denegación da autorización do parque eólico AMR 7 PE Arnoia.
DOCUMENTO DE ALEGACIÓNS (elaboradas por Petón do Lobo e que serven de base para o modelo resumido).
ENTREVISTA SOBRE O NOVO PROXECTO EN GALICIA.PRESS
Moibem moibem !!